PR մասնագետի ուղեցույց. 11 քայլ դեպի հաջող միջոցառում

Հանրային կապերի մասնագետը պետք է ունենա միջոցառումների կազմակերպման լավ հմտություններ, հատկապես եթե աշխատում է փոքր ընկերությունում կամ պատասխանատու է նաև միջոցառումների հաղորդակցման համար։  

11 հուշում՝ միջոցառումն արդյունավետ կազմակերպելու համար։ 

1. 📌 Մշակեք աշխատանքային պլան

Միջոցառման կազմակերպման և իրականացման ամբողջ գործընթացը պլանավորված և հանգիստ անցկացնելու համար մշակեք մանրակրկիտ աշխատանքային պլան՝ հստակ ժամկետներով և պատասխանատուներով։ 

2. 👥 Ձևավորեք աշխատանքային թիմ

Աշխատանքային թիմում ընդգրկեք փորձառու և պրոֆեսիոնալ մարդկանց, ովքեր, պատասխանատու լինելով միջոցառման կոնկրետ հատվածի համար, առանց խնդիրներ ստեղծելու որակով և ժամանակին կիրականացնեն իրենց գործառույթները։ 

3. 💰Մշակեք իրատեսական բյուջե

Մանրամասն կանխանշեք ծախսերը և զգուշությամբ մշակեք նախահաշիվը։ Համոզվեք, որ միջոցառման բոլոր բաժինների ծախսերը ներառված են և նախատեսեք հստակ բյուջե չնախատեսված/անսպասելի ծախսերի համար։  

4. 🎯 Ճանաչեք ձեր լսարանին

Ուսումնասիրեք և բացահայտեք ձեր լսարանի կարիքները, որպեսզի ձեր միջոցառման բովանդակությունը բավարարի նրանց սպասելիքները և ունենաք դրական ազդեցություն։  

5. 📅 Ընտրեք ճիշտ օր և ժամ

Անպայման հաշվի առեք այնպիսի գործոններ, ինչպիսիք են՝ օրացուցային օրեր, պետական և հանրային միջոցառումներ, Կառավարության և Ազգային ժողովի նիստեր, տոներ և այլն։ Ընտրեք այնպիսի օր, երբ դաշտը համեմատաբար ազատ է թե մասնակիցների, թե լրատվամիջոցների համար, որպեսզի ապահովեեք բարձր մասնակցություն։  

6. 🏛 Ընտրեք ճիշտ վայր

Վայրն ընտրելիս հաշվի առեք միջոցառման թեման, դահլիճի տեխնիկական հագեցվածությունը, լսարանի քանակը, վայրի հասանելիությունը, եթե ընտրել եք վայր, որը դժվար հասանելի է, բայց ընտրությունը սկզբունքային է ձեզ համար, ապահովեք թե մասնակիցների, թե լրագրողների տեղաշարժը։ 

7. ✨ Եղեք ստեղծագործ և պարտադիր ունեցեք ԽԱՅԾ

Ուսումնասիրեք նախկինում իրականացված նմանատիպ միջոցառումները և պլանավորեք այնպես, որ այն չկրկնվի, ավելացրեք նորություն և այնպայման որևէ խայծ, որը կգրավի և հանդիսատեսին և լրատվամիջոցներին։ Բայց հիշեք, որ այդ խայծը պետք է լինի իսկական, որը պետք է դրականորեն զարմացնի և միջոցառումը դարձնի հիշարժան։ 

8. 📢  Ապահովեք արդյունավետ հաղորդակցություն և հետևողականություն

Լսարանին և լրատվամիջոցաներին ներգրավեք միջոցառման նախապատրաստական, իրականացման և գնահատման փուլերում՝ լսելով նրանց արձագանքն ու կարծիքները։ Համոզված եղեք՝ այս դեպքում միջոցառումը կդառնա թիրախային, լսարանի կարիքներից բխող և կօգնի հետագայում ավելի լավ կազմակերպել հաջորդ միջոցառումը։ 

9. 🎤 Հրավիրեք ասելիք ունեցող հյուրերի

Միջոցառումը գրավիչ և խոսուն դարձնելու համար հրավիրեք հասարակական դիրք և, ամենակարևորը, ասելիք ունեցող մարդկանց՝ որպես բանախոս, վարող, պատվավոր հյուր և այլն, ինչը հավելյալ արժեք և գրավչություն կհաղորդի ձեր միջոցառմանը։  

10. 📸 Ապահովեք պրոֆեսիոնալ ֆոտո և վիդեո նկարահանում

Միջոցառման ավարտից հետո ձեր միջոցառման մասին պատմելու են նկարներն ու տեսանյութերը, պետք չէ գումար խնայել այդ հիշողությունը գեղեցիկ ու որակով պատմություն դարձնելու համար։ Անպայման ֆիքսեք հանդիսատեսի և բանախոսների, հյուրերի  էմոցիաները, այդ նկարներն արագ տարածման երաշխիքն  են։  

11. 🔄 Եղեք ճկուն

Ամեն օր վերանայեք աշխատանքային պլանը, անհրաժեշտության դեպքում կատարեք փոփոխություններ՝աշխատանքի ընթացքը բարելավելու և հնարավոր լավագույն արդյունքների հասնելու համար:

Ճիշտ պլանավորման, ստեղծարարության և հետևողականության դեպքում ցանկացած իրադարձություն կարող է հաջողություն ունենալ: